ಡಾ. ಪ್ರೇಮಲತ ಬಿ. ಬರೆದ ಈ ದಿನದ ಕವಿತೆ

ಉಳಿದ ಕಿಡಿಗಳು…

ಎಂದೋ ಹೊತ್ತುರಿದ ಪರ್ವದಿನಗಳ
ಅಗ್ನಿ ಕುಂಡದಲಿ, ಇನ್ನೂ ಬಿಸುಪು
ಉಳಿದಿರಬಹುದೇ ಎಂದು
ಕಣ್ಣೋಟದಲಿ ಮಿಂಚನರಸಿ
ಬರಬೇಡ ಹೊತ್ತು ಸಿಡಿವ ಕಿಡಿಗಳನು

ನೆರೆತ ತಲೆಗೂದಲು
ಮೈಯ ಸುಕ್ಕಲು ಬೆಸೆತ
ಹೊಸ ಬಾಂದವ್ಯಗಳ ಒಂಟಿ ಬದುಕಿನ ನಡುವೆ
ಉಳಿದಿರಬಹುದೇ ಎಂದು, ಕಾಡಿದ
ಅಂದಿನ ಆ ಬೆಳದಿಂಗಳು

ಭದ್ರವಾಗಿಟ್ಟಿರುವೆ ಜೋಪಾನ
ತೆರೆಯಹೊರಟರೆ ಉಕ್ಕಬಹುದು
ಆದರೂ ಒಪ್ಪಲಾರೆ, ಬತ್ತದೊಲವ
ನೋವಿನಲಿ ಮೌನ
ಹೊಲಿದ ತುಟಿಗಳ ನಡುವೆ ಉಳಿದ ನಮ್ಮದೇ ಧ್ಯಾನ

ಮನದುಳಿದ ಚಿತ್ರ ಕದಲಿಸಿ
ಕಳೆದ ದಿನಗಳ ಮರುಕಳಿಸಿ
ʼಒಂದಿಷ್ಟು ಜೀವಿಸು?ʼ ಎಂದವನ
ಕರೆಗೆ ಓಗೊಟ್ಟು, ಅಂದು ಬದಿಗೆ
ಸರಿದು ನಿಂತವನ ಪ್ರಶ್ನೆಗೆ ಉತ್ತರವಾಗಲಾರೆ

ಡಾ.ಪ್ರೇಮಲತ

ಡಾ. ಪ್ರೇಮಲತಾ ಲೇಖಕಿ ಮೂಲತಃ ತುಮಕೂರಿನವರು, ಕಳೆದ ೨೧ ವರ್ಷಗಳಿಂದ ಇಂಗ್ಲೆಂಡಿನಲ್ಲಿ ನೆಲೆಸಿದ್ದಾರೆ. ವೃತ್ತಿಯಲ್ಲಿ ದಂತವೈದ್ಯೆ. ಹವ್ಯಾಸಿ ಬರಹಗಾರ್ತಿ. ‘ಐದು ಬೆರಳುಗಳುʼ, ‘ತಿರುವುಗಳುʼ, ‘ನಂಬಿಕೆಯೆಂಬ ಗಾಳಿಕೊಡೆʼ ಇವರ ಪ್ರಕಟಿತ ಕಥಾಸಂಕಲನಗಳು. ‘ಕೋವಿಡ್‌ ಡೈರಿʼ ಎಂಬ ಅಂಕಣ ಬರಹಗಳ ಪುಸ್ತಕ ಮತ್ತು ‘ಬಾಯೆಂಬ ಬ್ರಮ್ಹಾಂಡʼ ಇವರ ಇತರೆ ಪುಸ್ತಕಗಳು. ‘ಐದು ಬೆರಳುಗಳುʼ ಕಥಾ ಸಂಕಲನಕ್ಕೆ ಡಾ.ಹೆಚ್. ಗಿರಿಜಮ್ಮ ಪ್ರಶಸ್ತಿ ದೊರಕಿದೆ.